G‘ayrat, bu ham boshqaruvning bir qismi

O‘zaro kelishgansan, yana kelishuvni buzishadi.

Avval ham tushuntirgansan, yana xato qilishadi.

G‘azablanasan, nima qilsa qilaversin, aralashmayman, deysan o‘zingga.

Shunday qilsang xotirjamroq ishlayman, deb o‘ylaysan — adashasan.

Ichingda saqlab, o‘ziga aytmagan har bir gaping, masalang senga yuk bo‘ladi.

Yuk oz bo‘lsa ko‘tarolasan, yengil tuyuladi. Lekin, soni ko‘payishi bilan juda oz yuk ham og‘ir tuyula boshlaydi.

Xuddi, 250kg toshni ko‘tarayotgan sportchi singari, qo‘shimcha 5 kg ham tez bilinadi.

Endi avvallari sen e’tiborsiz qoldiradigan kamchiliklari, xarakteridagi unsurlar yaqqol ko‘rina boshlaydi, yoqmay qoladi.

Oldini olish uchun yelkangda to‘plama, tezda gaplash, masalani hal qil. Bo‘lmasa odamlarni yomon ko‘rib qolasan.

O‘zi gaplashsang u tomon ham atay qilmagani, esdan chiqib qolgani yoki biror jiddiy, asosli argumenti chiqib keladi.

Qiyinmi? Ha qiyin, biz jamoadoshlarimiz, Azizbek akam bilan salkam 4 yildan beri og‘ir suhbatlar qilamiz.

4 yil avval ham suhbatni boshlashdan avval qiyin bo‘lar edi, hozir ham noqulay. Gap boshlangandan keyin osonlashadi, doim.

Farqi, qiyin suhbatlar avvallari har 2-3 kunda bo‘lgan bo‘lsa, hozir oyda 1-2 marta bo‘ladi.

Va biz qiyin suhbatlarni boshqaruvning bir qismi, deb qabul qilib bo‘lganmiz. Va kechiktirmaymiz.