Ahror aka, qo‘rqitib qo‘ymang

Siz katta jamoa menejerisiz. Ba’zan qo‘l ostingizdagilar shikoyat qilib sizdan tepaga chiqishlari mumkin.

Rahbariyat holatni tushunish uchun sizdan ham ma’lumot so‘raydi. Agar shikoyat o‘rinli bo‘lsa, xatoyingizni ko‘rsatib, yaxshiroq yechim taklif qilishadi.

Agar holat shikoyatdagidan farqli bo‘lsa, bunday tushunmovchiliklarni oldini olish yo‘llarini o‘rgatishlari kerak.

Chunki xodimlar har doim menejerning nima va nega qilayotganini tushunavermaydi, ba’zan noto‘g‘ri xulosaga kelishadi.

Bu tabiiy jarayon. Buni o‘zingiz va kompaniya uchun o‘sish imkoniyati deb qabul qilishga o‘rganing.

Lekin muhim nuqta bor — e’tirozni eshitganingizni na shikoyat qilgan odamga, na uni yetkazganga bildirmang.

Aksincha, sukut saqlab, o‘zgarishga harakat qiling. “Nega menga aytmadingiz?” demang. Shunda vaqt o‘tib, odamlar o‘zlari sizga fikrlarini ochiq aytishni boshlaydi.

Agar aksincha, shikoyat qilgan odamga e’tirozingizni bildirsangiz, ular sizdan qo‘rqib qoladi.

Natijada, sizga fikr bildirishmaydi, muhim ma’lumotlar sizgacha yetib kelmaydi, va xatolaringiz yomon qabul qilinadigan bo‘ladi.

Oxir-oqibat, sizni ishdan ketkazishga harakat qilishadi. Va bu sizning xatoyingiz bo‘ladi.