G‘ayrat, mijozning xatosini qidirma. Bu senga ham, kompaniyaga ham hech qanday foyda bermaydi.

Aksincha, hatto haqsizdek tuyulgan shikoyatlar orasidan ham o‘sish uchun imkoniyat qidirishing kerak.

Yaqinda bir mijozimizni maktabga chaqirib, mas’ullar bilan birga shikoyatlarini muhokama qildik.

Ochig‘i, u kishining asosli e’tirozlaridan tashqari, yaxshilanishimiz uchun 6 ta kamchilik topdik.

Ha, mijozda ham kamchiliklar bor edi — buni o‘zlari ham, biz ham ichimizdan sezib turdik. Lekin gapni o‘sha tomonga burmadik, burdirmadik.

Buning o‘rniga, u kishining farzandi misolida boshqa o‘quvchilarimizga yanada yaxshiroq sharoit yaratish va sifatli ta’lim berish haqida gaplashdik, vazifalar chiqardik.

O‘sha suhbatda qilgan yaxshi ishlarimiz yoki yutuqlarimiz haqida ham og‘iz ochmadik. Chunki norozi mijozga bu haqida gapirishdan foyda yo‘q edi.

Unutma, sen mijozga ko‘pi bilan maslahat bera olasan, ammo kompaniya ichida esa haqiqiy o‘zgarish qilishing mumkin.

O‘zgartiroladigan muammolaring haqida bosh qotir, shu orqali o‘sasan, kompaniyani ham o‘stirasan.