G‘ayrat, yakka o‘zing hech kimsan

Qaysi lavozimda bo‘lishingni farqi yo‘q — biznes egasi, direktor, menejer yoki xodim — o‘zingni “eng muhim” deb o‘ylama.

Biznes egasi bo‘lsang: “Men pul topmasam, g‘oya bermasam bu ish yurmaydi” dema. Pul, g‘oya — benzin. Ha, u kerak, lekin zapravka bitta emas.

Direktor bo‘lsang: “Men boshqarmasam, ish to‘xtaydi” dema. Sen haydovchiga o‘xshaysan. Ha, mashinani yo‘naltirasan, lekin shofyorni ham almashtirish mumkin.

Menejer bo‘lsang: “Men bo‘lmasam, energiya bo‘lmaydi” dema. To‘g‘ri, sen akkumulyatorga o‘xshaysan. Hamma sendan energiya oladi. Lekin, seni ham alishtirsa bo‘ladi.

Xodim bo‘lsang: “Men ishlab bermasam, tushum tushmaydi” dema. Seni g‘ildirakka o‘xshatish mumkin. Ha, g‘ildiraksiz mashina yurmaydi, lekin g‘ildirak teshilsa, almashtirib olaverishadi.

Lo‘nda gap shuki: mashina faqat hammasi birgalikda ishlaganda yuradi. Benzinsiz ham, haydovchisiz ham, g‘ildiraksiz ham yurmaydi. Lekin hech biri yolg‘iz o‘zi hammani o‘rnini bosa olmaydi.