G‘ayrat, xodim, ayniqsa yangi bo‘lsa — senga savol bilan chiqishi yaxshi holat

Stiv Jobsning “

Biz sizni sizga o‘rgatish uchun emas, siz bizga o‘rgatishingiz uchun ishga olganmiz

”

degan gapi mutaxassisning o‘z sohasi bo‘yicha ishlariga taalluqli, hamma narsaga emas.

Masalan:
• Marketolog marketing bo‘yicha sendan maslahat so‘ramasligi kerak, lekin jamoasi boshqaruvida ikkilanib qolsa — albatta senga murojaat qiladi.

• Sotuvchi sotish texnikalarini sendan o‘rganmaydi, lekin mahsulot bo‘yicha bilmaydigan ma’lumotlarini sendan so‘raydi.

• Maktabda tajribali direktor dars tahlili yoki o‘quvchi-o‘qituvchi bilan ishlash bo‘yicha sendan so‘ramagani yaxshi, lekin dars rejasini o‘zgartirish kabi umumiy masalalarda senga murojaat qilishi tabiiy.

Agar sen ularga:
“Shu oddiy narsani ham mendan so‘ramang”
deb dakki beradigan bo‘lsang, ular sendan so‘rashi kerak bo‘lgan masalalarda ham mustaqil (ba’zan zararli) qaror qila boshlaydi.

Mutaxassisligiga oid savol bilan chiqqanida esa:
“O‘zingiz qanday yechimni ma’qul ko‘rasiz?”
deya uni mustaqil fikrlashga o‘rgatish kerak. Chunki hamma ham bilganini darrov mustaqil bajara olmaydi.

Shu sababli, senga savol yoki maslahat bilan murojaat qilishsa — xursand bo‘l. Bu ularda ham sendagidek fikrlash va asta-sekin mustaqillikni shakllantiradi.

Agar umuman murojaat qilishmayotgan bo‘lsa — xafa bo‘l. Chunki yoki seni foydasiz deb o‘ylashyapti, yoki ilgari tanbeh berib qo‘rqitib qo‘ygansan. Buning oqibati esa — ko‘proq xato.

Kamina, o‘zi mas’ul jamoadoshlaridan tez-tez gaplashishni, ikkilangan joylarida uyatmasdan so‘rashlarini so‘raydi. Shunga bo‘lsa kerak, har kuni eng kami 3-4 nafar menejerlar bog‘lanib, u yoki bu yangi masalada maslahat, tavsiya olishadi.

Rahbarlarga o‘rgatish, yo‘l ko‘rsatish yarashadi.