G‘ayrat, yangi xodimingga mutlaq ishonishing kerak

Intervyuda ikkilangan bo‘lsang ham ishga olding. Endi unga to‘liq ishonishing, eplab ketishiga yordam berishing shart.

Aksiga, eplolmasligidan qo‘rqib, har xatosida “haq ekanman” deb o‘zingni ovutish bilan kuchli rahbar bo‘lolmaysan.

Chunki u eplolmasa ham ayb senda bo‘ladi: yo yetarlicha o‘rgatmagansan, yo yetarlicha motivatsiya bermagansan. Ikkalasi ham bo‘lmasa, ishga olishda xato qilgansan.

Demak, ishni eplab ketishi yoki ketmasligi senga bog‘liq. Ishonmasang, eplolmaydi. Chunki xato qilib o‘rganishiga imkon bermaysan. Umidsizlikka tushaverasan. Ishiga borgan sari aralashaverasan. Kichik xatosi ham katta ko‘rinib boradi.

30 yillik ta’lim tajribasiga ega ustozlarimizdan biri:

“Ustoz o‘quvchiga 2 qo‘yar ekan, o‘ziga ham 2 qo‘yadi aslida”, — deb aytgandilar.

Boshqaruvda ham shunga yaqin gapni aytish mumkin:

“Xodimni bo‘shatar ekansan, o‘zingning layoqatsizligingni ham isbotlayapsan”.

Xato qilsachi? O‘rgatasan.
Istamasachi? Qiziqtirasan.
Bu qancha davom etadi, deysanmi? O‘rtacha 3 oy — to‘liq ishonch bilan.

Ishonchni oqlamasligi ham mumkinmi? Ha, mumkin. Har safar o‘rgatgan narsangda xato qilsa, ishonching 100% dan kamayib boradi. Buni ham o‘ziga bildirib borasan.

Lekin yangi xato qilsachi? O‘zing o‘rgatmagan masala bo‘lsachi? Urishmaysan — o‘rgatasan.

Shuning uchun rahbar sifatida eng muhim ishlaringdan biri — ishlashga xohish paydo qilish va o‘rgatish.

Ishonching 50% dan pastga tushdimi, afsus endi ketkazishga majbursan va bu uni emas, seni xatoying bo‘ladi.