G‘ayrat, ketmoqchi inson baribir ketadi

“Ketish” gapi — o‘yin emas. Ba’zilar oylik yoki lavozimini ko‘tarish uchun bu kartani erta ishlatib qo‘yadi.

Tajribasiz rahbarlar esa qisqa muddatdagi zarardan qo‘rqib asossiz talabga ko‘nadi. Natija — muhit buziladi, boshqalar ham ish bitirish uchun shu yo‘lga o‘tadi.

Kimdir qattiq stress yoki charchoq sabab ketish haqida gapirib qo‘ysa — tushuntiriladi, xatosini tushunsa bir marta imkon beriladi.

Ikkinchi marta “ketaman” deganlarga esa — chiqish eshigi hurmat bilan ko‘rsatiladi.

Bir kishining kayfiyati, kaprizi yoki taktik shantaji — jamoa, kompaniya manfaatidan ustun bo‘lmasligi kerak.

Yaqinda bizga juda kerak bo‘lgan mutaxassislarimizdan birlari bilan ham shu sabab tufayli xayrlashdik. To‘g‘rirog‘i, olib qolishga urinmadik.

Ketmoqchi odam ketgani yaxshi, deymiz.

Qo‘shimcha

Azizlar, ketish haqida gapirmasdan ham istalgan muammoni muhokama qilish mumkin, va shunday bo‘lishi ham kerak.

Ketish bilan qo‘rqitish muzokarada ishlatildimi, tajribali tadbirkor/rahbar sizni o‘z jamoasida uzoq muddatga ko‘rmay qo‘yadi, sizdan xotirjam bo‘lolmaydi.

Orangizda hali tadbirkor, rahbar bo‘lmaganlar yuqoridagi yondashuvimizga qo‘shilmasligi tabiiy, chunki hali bu og‘riqni shaxsan yashashmagan.

Unda nega yozyapman? Biznes egasi, tajribali tadbirkorlarning shu masalaga munosabati qanday bo‘lishini bildirish uchun.

Unutmaylik, aksar tadbirkor/rahbarlar avval xodim bo‘lishgan va xodim tomondan ham masalaga yondasholadi, xuddi shunday kamina ham.

Suhbatlashib masalani yecholmadikmi, ishlamaslik to‘g‘ri degan xulosaga keldikmi? Shunda ketish haqida aytish va ketish kerak.

Tabiiy, bunda ishingizni yo‘qotasiz, lekin obro‘yingiz o‘zingiz bilan ketadi.