G‘ayrat, bozordan ko‘proq to‘laganing — o‘zingga foyda

Avvalo, kuchli kadr arzonga ishlamaydi. Uning doim boshqa takliflari ham bo‘ladi, bilasan.

Boshqa tomondan, kadr qancha vijdonli bo‘lmasin, bozordan kamroq oylik berib, uni nafsi bilan yolg‘iz qoldirsang — qiynalib ishlaydi.

Uyda oilasi, ko‘chada do‘stlari bor. O‘zining bozordagi narxini o‘zi qidirmasa ham, eshitib yuradi.

Qisqa muddat chalg‘imasdan ishini sen bilan davom ettirishi mumkin, lekin bu uzoq davom etmaydi.

Shu sabab, byudjetingni eng kami bozor darajasida, bo‘lmasa 10–15% balandroq belgilayver.

Shunda jamoang yaxshi muhit va yuqori oylik sabab mazza qilib ishlaydi, sadoqati ham balandroq bo‘ladi.

Biz maktablarimizda shunga jiddiy e’tibor qilamiz. Ayniqsa ustoz va murabbiylar uchun yuqori maosh berishga harakat qilamiz.

Shunda kutilmagan ishdan ketishlar, natijada ishning to‘xtab qolishi kabi holatlar keskin kamayadi. Ba’zilar pul sabab bo‘lsa ham to‘satdan ketib qolmaydi.

Yana bir gap: halol pul topish uchun ishlashning hech qanday yomon tomoni yo‘q. Aksar jamoadoshlar shunday bo‘ladi.

Juda kam odamlar puldan boshqa maqsadlar uchun sen bilan birga bo‘ladi. Shunda ham ularga zo‘r to‘lashing shart.

Va sadoqatlilarnigina rahbar qilasan, yoki-da rahbarlikda qoldirasan.

Sadoqatini bilish uchun esa uzoqroq ishlashing, ba’zan sinashingga to‘g‘ri keladi.